Nueva Casa

http://lallinguaapacer.nireblog.com

Sí, adivinástislo... yo tamién cambio pa nireblog y los sos blogues n'asturlleonés... Asina qu'esto echa'l pieslle.

Nuevu Añu

Dende Alhucemas, nel Reinu de Marruecos, felicítovos con un poco de retrasu'l nuevu au 2008, qu'espero tea enllenu de felicidaes estatutaries (hahaha) como nun lo tuvo'l 2007. Siguiremos otru añu más (agora espero que sí) falando de lo mesmo y lo mesmo p'aburrir a les piedres, como ye vezu.

Flotes y costes: Cuestión xeográfica

Cada día que pasa préstame más la xeopolítica... Y ye que güei tuvimos viendo en clas les potencies navales y les potencies continentales a lo llargo del sieglu XX según un modelu xeopolíticu nel qu'habría siempres una potencia naval y otra continental (Anguaño podríen ser EEXX y China respeutivamente).

El casu ye que diome por plantegame si habría rellación ente la xeografía del país o potencia y la so armada... Y paezme que sí, y non sólo eso, sinón que ye aínda más fuerte que la qu'hai ente capacidá económica y grandor del exércitu... Y ye que ye más qu'evidente'l fechu de qu'un país poderosu no económico va tener capacidá de xuru de selo tamien no militar... Pero naide nun se plantegó'l fechu de cómo la proyeición naval va determinada poles carauterístiques de les costes y del propiu país.

Paez evidente qu'hai países más proyeutaos al mar qu'otros... Los EEXX nos que la población asítiase nes dos costes o la islla del Reinu Xuníu diben ser dos exemplos de potencis navales con proyeición costera... demientres que la Rusia de les estepes o l'Alemaña de la cuenca'l Rur diben ser otros exemplos de países notru tiempu podersos que tuvieron una proyeición naval...

Coses de la vida y coses rares, pero paez que lo mesmo l'Alemaña Nazi que la Xunión Soviética quixeron más escoyer un modelu de marina de guerra averáu al emplegu masivu de somarinos (U-Boat primero y nucleares con ICBM's depués), al tiempu que'l Reinu Xuníu y los EE.XX. diben enfotase más nel emplegu d'acorazaos, cruceros, destructores y portaaviones... ¿Por qué la XRSS tenía más somarinos que los EEXX y, al mesmu tiempu, los EEXX teníen 12 vegaes más portaaviones que la XRSS? Xapón, tenía somarinos (somarinos tiénenlos toos) pero pol so calter d'islla basó la so estratexa naval na SGM nel emplegu de grandes acorazaos y portaaviones (colos sos carauterísticos kamikazes)... Paez que la salida al mar ye una cuestión mui decisiva a la hroa de decidise por un modelu d'armada o por otru. Y ello ye que la XRSS namái que tenía 3 puertos de mar: Murmansc, Leningráu y Vladivostoc, lo mesmo qu'Alemaña que tenía Hamburgu, un poco depués Danzig y poco más.

Quiciabes el fechu de tener poques entraes y pocos puertos fai que seyan más controlabres, poro, ye afayadizu l'emplegu de somarinos pa burllar esa vixilancia constante... al tiempu que nos países con tantes costes y puertos de mar asocede lo contrario... Ye un tema mui interesante, pero esto nun dexa de ser una conxetura que quería compartir con vós si ye que vos presten estes coses, cosa que duldo muncho...

¿Y si les coses nun foren como son?

Cuido que l'arrepentimientu ye ún de los motores de la humanidá. Dende'l claru exemplu del asesinu, lladrón o llamuerga social que va a misa y trabaya pa los probes col enfotu de redimir les sos culpes hasta la mesma creación de la novela histórica. La entruga ye mui humana ¿Por qué nun fixi esto o aquello?, pero la llinialidá del tiempu (pel momentu'l tiempu ye llinial) impídenos volver atrás... y ye que como diz el griegu aquél, nunca nun te bañes dos vueltes nel mesmu ríu.

Dacuando, hai coses difíciles de cambiar na hestoria que nun dan llugar a esti arrepentimientu imaxinativu, pero otres vegaes, hai dellos momentos y episodios que propicien bien esto. Ún d'ellos, ye, de xuru, la revolución d'Ochobre del 34 y la declaración d'independencia del Conseyu Soberanu d'Asturies y Llión. Dos intentos fracasaos nos qu'Asturies (y llión tamién nel segundu casu) intentaron d'un mou o d'otru, con unos propósitos o con otros, facese'l so camín na hestoria y pensar por sigo mesmos... y ye que d'entós p'acá nunca nun volvió a ser "independiente" la nuesa voluntá histórica de la d'aquellos que mos arrodien (Europeos, Españoles... nos que mos enxertamos d'un mou más o menos cómodu). Por eso... y si... y si'l 34 fore un trunfu militar d'Asturies? ¿Y si la Xunión Soviética tuviere sofitao'l golpe con tanques, aviones y sofitu naval direutu? Bien ye claro que les reaiciones internacionales podríen ser evidentes y desencadenar una guerra pero... ¿Acasu nun foi quien Hitler a invadir Austria y la república Checa ensin que naide-y parare los pies? Bien ye posible un escenariu históricu d'una república asturiana independizada como tal, embaxo d'un gobiernu comunista con sofitu soviéticuu y na órbita socialista... (Sí, pa bien o pa mal, sacantes los británicos, toos tamos siempres nuna órbita).

Tamién podía ser perfeutamente posible l'escenariu d'esta república na guerra fría, l'espionax, les tensiones nucleares... la instalación de cabeces nucleares soviétiques en llangréu col envís d'amenazar París o Madrid... ¿Y esi dictador Franco, ganador de toles batalles menos d'una? ¿Cómo diben ser los sos discursos na plaza d'Oriente de Madrid? ¿Atreveríase a visitar Asturies? ¿Tendría rellación diplomática? ¿Reconoceríala como un estáu? ¿Qué daríen los españoles nes sos escueles sobro Asturies? ¿Y los asturianos sobro España? ¿Valdría la independencia pa que la lllingua recuperare puxu y valor alministrativu? ¿Escribiríase en cirílicu?

Y ye qu'igual glayaríen siempres: Пуша Aстурeс либрэ и рoша!!

L'entamu

Como daquién aldovinaría yá, la embaxada prieta cambia dafechu les sos formes y oxetivos... Nos prósimos díes vais asistir al cambeu...

Allocución de clausura

L'aquello de tener un blogue ye l'enfotu que m'impulsó a llevantar la embaxada... Y bono, equí tuvimos per cuasi yá un añu con époques d'aición y otres ensin tanta... Bramente nun toi convencíu de la repercusión d'un blogue (a lo menos d'esti) nin na sociedá nin na política nin nenyures...

Paezme qu'un blogue, sacantes dellos que por mor de la so importancia-atractivu nun cumplen esta riegla, nun val (a lo menos na Asturies que fala Asturianu) pa llegar a naide, non a lo menos a naide que nun quiera pensar lo que tu o como tu. Desengañéme. Esto nun val p'abrir les mientes de naide nin pa esparder un mou de pensar y talantar Asturies estremáu del oficial. Ésti blogue ñació con un marcáu calter políticu y social y nun vio en tou esti tiempu reflexu dalu de que pagare la pena tenelu...

Pue que nun futuru esti embaxador se dedique a otres coses o monte otru blogue, pero la carrera diplomática fina equí y nun veo niciu de que vaiga siguir... Asina que, más nada, esta embaxada echa'l pieslle y esti territoriu que per unos meses foi embaxada ye devueltu al so estáu d'orixe: L'ermu.

Un saludu a toos.

Elleiciones Xenerales, ¿candidatures xunitaries?

Les elleiciones xenerales, pa un nacionalismu que nun tien nin escaños nin cuasi conceyales o alcaldes (por nun tener, nun tien nin una mayoría absoluta nun conceyu) pue ser una gran oportunidá pa dar pena énte un resultáu aínda más vergoñosu que'l de les nacionales/de conceyu... O, si s'enfoca bien la tema, pue ser un bon momentu p'afianzar elleutoráu y entamar a preparar les nacionales de dientro d'unos años (si nun hai presupuestos pue que menos años de los qu'imaxinamos)...

Como toos sabéis, nes xenerales hai dos papeletes, una d'un collor y otra d'otru, una d'elles más pequeña qu'un foliu, col logo d'un partíu, les siegles, el nome y la riestra candidatos/es que defende'l partíu en custión... Esta ye "la que val", de la que depende la investidura de ZP o Rajoy, la que condiciona al gobiernu, la que pue sirvir pa facer política y encumar a un candidatu al suañáu sillón de diputáu....

La otra papeleta, la que por grande que seya pasamos d'ella, ye como una sábana de grande, y tien cuadradinos al llao de 3 nomes de candidatu qu'apurre cada partíu. Nella hai bien de partíos y ún pue escoyer votar a ningún, a 1, a 2 ó a 3; del mesmu partíu o d'otros. Son los archifamosos senadores, que valen pa evitar que la constitución nun se reforme y pa poco más (el PP tien mayoría nel senáu y nun-y valió de nada).

Evidentemente, nin siquier IX va sacar un senador n'Asturies (duldo muncho que seya quien a sacar diputáu), pero podría ser el senáu una bona forma de presnetar una candidatura UNIDÁ-Andecha-UAS... al tiempu que les tres candidatures se presenten soles a les xenerales... ¿Qué pasaría? ¿Efeutu llamada na candidatura de xuntura? ¿Mesmos resultados? ¿Más per separtao que xuntos?... Diba ser interesante. Pero nun lo vamos ver, hai abondos intereses non yá partidistes, sinón personalistes como pa que salga una candidatura xunitaria anque namái que seya "de prebes"...